pega: SERMON BUATSAIH DAN TLUANGTLAM

                                                                       HOMILETICS

(Pathian thu nghahchhan a hmanga thu sawi)

                Mizo te hian Pathian thu kan tui puiin, sawi pawh kan sawi nasa hle. Thlarau lam chawmna leh fuihna aia, mahni tuippui zawng leh thinrim hrik thlak na atana Pulpit hmang ta mai te pawh kan awm hial thin awm e. Chu vangin Pathian thu sawi dan leh kan sawi tur buatsaih dan hi kan hriat atul hle awm e.

                Sermon/ Thuhril tih hi enge a awmzia?

                Tu emaw in,mipui hma ah thu tha leh ngaihnawm tak asawi a, “A sermon tha hluah hluah hle mai’’ kan ti ngawt thin hi kan ti dik lo. Sermon chu -  Pathian thu dik, mihring in mihring vek te hnena Pathian thu chah anga a rawn puan chhuah hi ani.

                Pathian thu sawi hi thil namai anih loh avangin, keimahni mizia zir hmasa ber chunga kan in buatsaih atul tak zet.

THUHRILTU  MIZIA

1. Mi tih dan lak chhawn (copy) a ching tur ani lo : A thu sawi dan hmang, a aw hman dan leh tawng kau chheh, chet dan phung leh hawi her thlengin, ama nih na leh amaha tanga chhuak khan mi thuinlung a hneh zawk.

2.Pathian ngaihsak mi ani tur ani : Taksa leh Thlarau bawlhhlawhna tinreng lakah a inserh tlat tur ani a. Thutak chiah sawi mi, uang thuang lo, mi ze nghet ani tur ani. Tin, thu uar luat leh sawifiah tum luat avangin a hriat bak thleng thleng a sawi tur ani lo. Pathian angaichang tlat tur ani.

3.Thuhriltu chu ati tak tur ani : Ennawm leh fiamthu thawh tu nilovin Pathian thu chah keng tu ani a. Tawng thlahdah leh tih mai mai na lakah fimkhur takin a inenfiah fo tur ani.

4.Thuhriltu chuan ataksa hriselna a ngaihsak tur ani: Taksa chak leh hrisel hmel hian mi a hneh hma in mi a hip a, pumpui na leh dawrawm hmel lutuk hian mi a hip lo thei thin.

5. Aw rawl leh chet phung :Aw rawl leh taksa chet phung pawh a awm leh hahdam tawk a hman chhuah a thiam tur ani, chu chuan rawngbawlna kawng ah a daih rei tir fo.

6. Thinlung ngaihtuahna dik a pu tur a ni :  Pulpit hi thinrim hrikthlakna leh midang sawi sel leh tai na hmun a nilo tih a hre tur a ni.

CHANG THLAN BIK NEIA THU SAWI

A thatna kawng hrang hrang te :-

1. Ngaithla tu te a bengkhawn tir.

2. Kan thusawi tur ati Pathian thu bik.

3.Thusawitu pawh huaisenna minpe zawk.

4.Thusawitu thil danga peng kual duah lovin a kai hruai.

5. Thusawitu ati Bible mi a. Achang thlan hrilh fiahna fel tak khan mipui rilru a kai hruai.

CHANG THLAN ZAWN DAN LEH ZAWN NANA PAWIMAWH TE

1. Mite thlarau chakkhai leh mamawh ngaihtuah tur. Mahni tui pui zawng ngawt dah pawimawh hmasak tlat loh a tha.

2. A tum ah chian hle tur, tum bulfuk ber pawh nei lova beih chiam hi a fello hle.

3. Mahni sawi fiah leh theih phak tawk ngaihtuah a, kan hriat chian loh leh hrilh fiah thiam loh leh inhnialna chawk chhuak thei lakah te fimkhur tur.

a). Pathianthu chik taka zir chiana, a mamawh tute tana tangkai tur chang hre hneh hle tur a belh chian tur.

b). Note bu neih tur. Rilru a Patrhian thu lolut leh entirnaa tana tangkai tur thil kan tawn leh hriat te ziak zel a. Mi te thusawi atanga kan thinlung khawih tu te pawh ziah luh zel a tha. Chu chuan Pathian thu buatsaihna kawng ah mi a tanpui thin.

c). Lehkhabu tha chhiar fo a, chung atang chuan thuusawi tur hmanrua dap thiam tur.

d). Thlarau Thianghlim nen inpawlna nung neih reng tur.

FIMKHUR NA TUR TE

1.Thil beiseiawm tak hlawhtlin tir tak tak theih si loh lakah fimkhur hle tur (Mizo te hian, ngaihruatna thu lawmawm ‘’Rau hmel’’ lam hi kan tui pui, kan Halelui pui tam tak hi chu, ngaihruatna thu ropui hmel taka thuhril tuten an au chhuah pui ataka hlawhtling tak tak thei lo tur thil ani chawk zuk nia).

2.Mi rilru tina thei leh a chhehvel thildang nena hmeh bel a rilru hruaipeng daih thei chang thlanloh tur.

3.Thu fiahlo leh a bawplawka lak theih thil thlan loh tur.

( Eg. Joba bu a Joba thiante thusawite kha thu dik ni ve tak, Khawvel Philosophy ani a. Joba sawi erawh chu Kristian Philosophy ani. A thiante thusawi zawk chang thlana hmang a Bible zirtir lohna lam kawng a kal thui vak a hlauhawm thei).

4. Uar luat na leh thudik ziktluak lo lakah fimkhur tur a ni.

5. Thil tha a lo thlen beiseiin thil thalo tih leh (dawt) sawi tur ani lo.

6. Ngaithla tute nawr vak vak leh tur chiam hi a fel lo hle tih hriat tur. Thlarau Thianghlim hmun ken tur a ni.

7. Sermon chu uluk leh awmze neia rem khawm tur (ruh rel felfai taka buatsaih a pawimawh hle)

8. Sawi nat/ sawi huai hi mi thenkhatin an lawm tih hriat vanga thu na leh huai tak taka sawi tum zen loh tur. Thu tluangtlam leh tlawm tak pawh ni se, Thlarau Thianghlimin a thawh chuan, ngaithla tu te thinlungah na takin a thleng tho, tih hriat a, chu mi chu beisei tlat zawk tur.

CHANGTHLAN THU AWMZIA CHHUT DAN

1. kan chang thlan tur chu, a chang mal mai nilovin a bung pumpui chhiar a zir chian ngei tur ani.

2. Kan chang thlan tawng kam chu a ngial a ngan nge tehkhin thu tih hriat chian tur.

3. Kan chang thlan chu a ziaktu in a hman chhan dik tak hriat tur.

4. Kan chang thlan chu a ziaktu leh a ziak chhan, a ziah hunlaia mi te nun dan leh hnam dan hriat tum ngei ngei tur.

5. Kan chang thlan chuan Bible hmun dangah awmze milpui a nei em tih en a, zawn peih tur.

6. Thu khingbai laklawh tak chang thlan loh tur.

SERMON THUPUI

Sermon thupui thlanthiam hi apawimawh em em, mi beng verh zawng tak thlan thiam a tha.

1.Kan thupui chu hriatfiah hle tur : Kan rilrua rei tak lo riak tawh, titi hona ah pawh kanlo sawi fo tawh.

a kalhmang pawh kan tuah rem theih ngei tur thlan a tha.

2.Thupui kan thlanin kawh hmuh tum fel tak kan neisa tur ani a. Angaithla tute chungah thleng ngeise kan tih tak tak kan thlang tur ani.

3.A hun leh ahmun leh angaithla tute a zirin thu sawi tur kan thlang thiam tur ani.

SERMON / THUSAWI TUR BUATSAIH

(Sermon ruh rel)

1.Thuhmahruai

2.Thupui  laipui

3. Thu tlangkawn na

THUHMAHRUAI IN  ATUM .

                
                 Thu ngaithla tu ten ‘Thu chah lamah beng an chit a, a cchunzawm zel ngaihthlak chak a beng an dawh a, an rilru chawh thawh/harh hi a tum ani. (Thuhmahruai sawi ruala kan sermon lai pui sawi lan nghal zuah zuah hi a fuh lo, sermon lai pui sawi hunah ngaithlatute thinlungah atlak nat loh phah thei)

                 ‘Tunah lo ngaithla ru le’ tih mai hian mi a hip lo a. Miin kan lamah beng an chhit a, kan thusawi chhunzawm zel tur an hriat chak theih nan thuhmahruai tha hi a pawimawh a, a rei lutuk tur ani lo.

Thuhmahruai tur zawn dan then khat te.

1. Kan chang thlan atangin, mite beng verh tura han kam keu zauh hi a tha khawp thin.

2. Kan changthlan hunlai chanchin atangin.

3. Kan chang thlan ziak tu/ thawntu leh chutih hunlaia an nun phung atangin.

                Thuhmahruai sawi hian aw a ring lutuk tur ani lova, thu thin thawng tak pawh sawi loh a tha. Tin a thui duah tur anilo. Minute 40 ah minute 5 vel hi atawk hle.

THUPUI LAI PUI

1. Thenkhatna (Enge?): Hei hian kan thupuiin a tum ber chu enge anih, a hrilh fiah tur ani a, a anpui emaw , a anpui miah loh a leh lam daih sawi pawh in a fiah thei .

2.Then hnihna :(Engvangin nge) :Kan thu hmasain a hrilh fiah tawh chu. Engvanga dik nge, eng vangin nge kan pawm ang, kan rin ang tih miin an pawm thlap theihna turin hrilhfiah leh a tul.

3.Thenthumna  (Engtin nge) : Sermon ah hian thil sawifiah a tawk mai lova, an chan tur leh an tih tur an duh/ an chan a. An tih tur leh tihloh tur te pawh an thlan fel theihnan, an ngaihtuahna leh inpekna etc chawk thova chetchhuah tir tur in kawng kan kawh hmuh tur ani.  

Kan sermon  tawp chuan mi ako, angen, a sawm tur ani.

SERMON TLANGKAWMNA

Kan sermon sawitawh chhui let kual leh vak a tullo.  A sei tur ani lova, kan thusawi tinghet tu atana tawngkam hnih khat zeh zauh a tawk. Chu thu tawite chuan ngaithla tute rilru ati nghet thin. A milpui tur hlathlan thiam a tha fo.

ENTIRNA LEH ENTIRNA IN A TUM TE

1.Entirna hian kan thuhril ati fiah a,mipui rilru pawh a khawih thei hle.

2.Kan mita kan hmuh leh kan tawn hriat ngei atanga entirna siam hian thinlung a hneh bik thin (Thu ngaithla tute nitin nun in amil/ an nun phung behchhan etc hi atha hle - Isua hian a hunlai leh chhehvel dinhmun leh boruak atangin, entirna leh tehkhin thu a sawi thiam hle)

3. Thu ril leh thu thuk tak nilovin thu mawl leh hriatthiam awlsam thlan thiam a tha.

4. Sermon pakhatah entirna atam lutuk tur ani lo, thu hlawm khatin entirna pakhat nei se a tawk hle.

HRIATTUR TUL TE

1. Thu i sawi dawnin thupha chawi suh.

2. Nel lutuk leh thamlo hmel takin thu sawi suh.

3.Thu i sawi in tuilui suh, i tum ber chu thiam taka sawi,ngaihnawm leh danglam taka sawi nilovin. Pathian lama mite tihsawt ni rawh se.

AW  HMAN DAN:

1. Aw dul hnuk maia i sawi chuan anning thuai ang. Aw ki pangai renga i sawi chuan an mut ati chhuak ang. Uar tur lai leh uar loh tur lai thliar la.Aw pangai in sawi tan la, atul angin aw sang leh hniam, ring leh zawi lam deuh te hmang ang che.

2. Tu thusawi dan emaw zir in, midang aw copy suh.

3.Hriat theuh turin sawi rawh. Mi an tam leh tamloh thliar thiam rawh.

4.I thusawi remin i aw hmang rawh.

TAKSA CHET DAN

1. I thusawi milin i taksa ti che la, tul lo leh awmze neilovin tawng pawng chet vak vak suh.

2.I mit in thu ngaithla tu te melh kual la, kun ngur leh khawilai emaw en bik ngur in thu sawi suh.

3. In cheina u chuak leh rang bei buai inbel suh.

4. Mahni inrintawkna nei la, Pathian ropui nan Pathian hmachhuan tlat zel ang che.

Hrilh fiahna lam sermon

(Expository Sermon)

A hlawkna te –

1. Thuhriltu leh ngaithla tute rilru a kai hruai bik.

2. Mahni tui pui zawng sawi vak lovin, Pathian Thu kalhmang awmze nei takin a chhui a, ngaithla tute tan a fiah bik.

- Entir nan –

- Isua thu sawi (Luka 4)

- Petera thu hril – Tirhkohte 2 – 3)

- Stephana thuhril (Tirhkohte 7 – 8)

- Paula thusawi – (Tirhkohte bung 28 tawp lam)

A hlawk lo thei hle bawk –

1) In buatsaihna tha tawk neih loh chuan, hlawkna a awmlova ngaithatute rilru a ti buai thlawn thei.

2)  Kan sujct ah kan chian tawk lohva, sawifiahna fumfe kan neih tgeih loh chuan, mipui beng athlep zui tawh thin… (Avan la  tam em…..  

  (( Sermon phung chi 7 te amal tete a zirho kan tum leh dawnnia..... Textual/Topical/ Typical/Expository/Biographical/Analytical/ Analogical.... te anni a....

Chhandamtawh a boral hlen theih tih leh theih loh tih chung changa, thenkhatte Bible chang innghahna .

Chhandamtawh a  boral hlen theih tih leh theih loh tih chung changa, thenkhatte Bible chang innghahna .

              Chhandamtawh a boral hlen theih ti tute Bible chang tanchhan tlangpui –

*  Tin, mifel chuan a felna a hawisana khawlohna a tiha, a hmaa tlukna ka lo dah chuanin, a thi ang: vaukhanna i neih loh avangin sualah a thi ang a; a thil fel tih tawhte chu hriatreng a ni lo vang; a thisen mawh erawh chu i lakah ka phut ang. Nimahsela mi fel chu sual lo tura i vaukhanna a sual loh chuan vauna a pawisak avangin a nung ang; nang pawhin i nun i hum him ang," a ti a. (Ezekiela 3:21)

* Tin, 'ka chhuahna inah khan ka kir leh mai ang,' a ti a; tin, a va thlen chuanin, ruaka, phiah faia, cheimawiin a hmu a. Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu, a hmasa aiin a lo tha lo zawk thin a ni. Chutiang bawkin tun lai chhuan sual takte chungah hian a la awm ang," tiin a chhang a. (Matthaia 12:44-45)

            Thil tha tihin Ktistian a chhandam em?

               

( Chhandama awm tura thiltha tih ni  lovin rawngbawl tura chhandam kan ni zawk)

* Thiltih avang a ni lo ve, chutilochuan miin an chhuang dah ang e.(Ephesi 2:9)

* Keima hming avangin mi zawng zawng huat in ni ang; nimahsela a tawp thlenga tuar peih apiang chu, chu mi ngei chu chhandamin a awm ang. (Matthaia 10:22)

Chhandamtawh a boral theih tawh lo ti tute Bible chang tanchhan tlangpui–

*  A bawhchhiatna ngaihdama awm a, a sualna hliahkhuha awm chu, a eng a thawl e. Mi, LALPAN khawlohna neia a ruat lohva,A thlarauva tihderna reng reng awm lova chu, a eng a thawl e. (Sam 32:1-2)

* Chung mite chu thisen hrin an ni lo va, tisa duhzawnga hrin an ni hek lo, mipa duhzawng pawha hrin an ni hek lo, Pathian hrin an ni zawk e. (Johana 1:13)

* Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.(Johana 3:16)

* Tupawh Fa ring apiangin chatuan nunna an nei tawh; nimahsela tupawh Fa thu awih lo apiangin nunna an nei lo vang a, Pathian thinur an chungah a awm reng zawk a ni,” a ti a. (Johana 3:36)

Sual hian hlawkna a nei lo

* Tu hnathawh pawh a kan chuan chu mi chuan a chan ang; amah tak erawh chu chhandamin a awm ang, amaherawhchu meia kal tlang ang maiin. (I Korinth 3:15)

*  Chuvangin, awm ila, awm suh ila, ama lawmzawng mi nih kan tum tlat thin a ni.( II Korinth 5:10)     

- Mi tinin taksaa thiltihte, a chhia a thain, kan tih ang zela kan hmuh theuh theihna turin, Krista rorelna thutphah hmaah chuan tihlanin kan awm vek tur a ni si a. Chutichuan, Lalpa tih nachang hriain mihringte chu kan thlem thin a, Pathian hnenah erawh chuan lantirin kan awm a; nangmahni chhia leh tha hriatnaah pawh lantira kan awm ka beisei. .( II Korinth 5:9-11) (He thu hianhremhmuna kal leh kal loh a kawk lo)

* Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a; (Galatia 6:7)

( A tlangpui chiah tarlan ani... lkb lamah kimchang zawkin...)

CHHANDAMNA ZAWNG MEK TUTE HARSATNA LEH AN ZAWHNA TLANGPUI TE (CONT...2)

CHHANDAMNA ZAWNG MEK TUTE HARSATNA LEH AN ZAWHNA TLANGPUI TE

  Duhdan bik riau neih (Lungawina zan ka la nei tlat lo)? 

( Kan duh dan leh kei mahni lama lungawi hmasak tum tlatna hi, bumtu hnathawh a ni. Ama duh dan ang anga nung tawh zawk turin, Pa lungawina awmchhun Fapa Isua Krista hnenah kan nun pumpui kan hlan ral a tul zawk a ni )

- Isuan a hnenah, “Keimah hi kawng leh thutak leh nunna ka ni; keimaha kal lo chu tumah  Pa hnenah an thleng ngai lo.( Johana 14:6)

- Pathian Lehkha in chhiar ngun thin, a chhungah chatuana nunna awmin in rin avangin: chung Lehkha chu ka chanchin hriattirtu chu a ni si a. Nimahsela nunna nei turin ka hnenah in lo kal duh si lo. (Johana 5:39-40)

   Engtin emaw tal ka fel/that phawt loh te chuan (famkim phawt tumna)?

( Nangma mimal chakna leh theihna ngau ngauva fel leh famkim thei nila, Isua hi i mamawh ve hauh lo vang. Pathian lawmtlak felna leh thatna famkim nei thei lo ten, Kan felna leh famkimna Isua Krista hi kan mamawh ngawih ngawih zawk a sin )

- Chutichuan Pathian hmaah mi tumah an inchhuang thei lo vang . Nangni erawh chu ama zarah Krista Isuaah chuan in awm a ni; ani chu Pathian hnen ata kan tan finnaah siam a ni, felnaah te, thianghlimnaah te, tlannaah te nen; (I Korinth 1:29-30)     

  Kei zawng ka inringhlel tlat a ni. (mahni inrinhlelhna) ?

( Nangmahah khan chhandam thei khawp che rin tur leh rintlak pakhat mah a awm lo. Nangma lamah rinchhan tur i dap tlat a nih chuan, i hmu ngai hek lo vang. Rintur tak Isua Kristaah nun pumpui hlan a tul zawk a ni )

- I thinlung zawng zawngin LALPA ring la, Nangma hriatnaah innghat suh; (Thufingte 3:5)

- LALPA ringtu, a rinchhan LALPA ni erawh chu a eng a thawl e. (Jeremia 17:7)

- Chutichuan, chhumpui nasa tak ang thlirtuten min hual vel avng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avng chuan mualphona chu ngainepin kraws chu a tuar a, Pathian lalthutphah ding lamah khian a han thu ta a. (Hebrai 12:1,2)

- Tin, rinna hi thil beiseite awm ngeia hriatna, thil hmuh lohte hriatfiahna a ni. (Hebrai 11:1)

 Tunah ni lovin, nakinah Isua hnen chu ka la pan dawn nia?.

( I hun hlutak kha Isuan a duh asin, i muang sual ange! )

- Chuvang chuan, Pathian ngaihsak mi tinin zawn hmuh awla i awm laiin i hnenah tawngtai theuh rawh se: Tui liante chu a lo liam hun chuan anni chu a chim pha thuai dawn lo nia. (Sam 32:6)

- Zilhhau fo pawha a ring tikhawng tlat chu, Vawilehkhatah tihtliahin a awm ang a, tihdamna a awm lo vang. (Thufingte 29:1)

- Ka ko che u a, in duh lo va, Ka kut ka phar a, tuman in ngaisang lo va; Chuvangin kei pawh in vanduai ni chuan ka nui ang a, In hlauh hun a lo thlen chuan ka nuihsan ang che u, (Thufingte 1:24-26)

- Hmuh awla a awm lai hian LALPA chu zawng ula, a hnaih lai hian ko rawh u: (Isaia 55:6)

- Nimahsela nunna nei turin ka hnenah in lo kal duh si lo. (Johana 5:40)

-  “Hun lawmawmah ka ngaithla che a,Chhandamna ni-ah ka tanpui che,”a ti si a.

Ngai teh u, tun hi hun lawmawm chu a ni a; ngai teh u, tun hi chhandamna ni chu a ni. (II Korinth 6:2)

-  Mi thenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e. (II Petera 3:9)

HRINGNUN MAMAWH TINRENG BIBLE CHHANNA (CONT...2)

Nun hlimna dik ka nei ve thei angem? Entinnge?

* Tin, Sari chuan, "Pathianin mi tinui ta; mi tin a hria apiangin mi nuihpui ang," a ti a. (Genesis 21:6 )

* Chu mi ni chuan inthawina nasa tak mai an hlan a, an hlim hle mai a; Pathianin hlim namen lohvin a tihlim a ni; tin, hmeichhiate leh naupangte chen pawhin an hlim hle mai a: chuti chuan Jerusalem hlimna chu hla tak atang pawhin an hria a. (Nehemia 12:43 )

* Chutichuan ani chuan an hnenah, "Kal ula, thil thau eiin thil thlum in ula, engmah buatsaih nei lote tan chanpual  thawn ang che u, vawiin ni hi kan LALPA tana ni thianghlim a nih hi, lungngaiin awm suh u; LALPA chunga lawmna chu in chakna a ni si a," a ti a. (Nehemia 8:10 )

* Hlimna a siamsak a, tah chuan an chawl a,  An kawngah chuan a mit a fu reng a. (Joba 24:23 )

*  Lalber, ka Pathian, ka chawimawi ang chia: I hming hi kumkhaw tlaitluanin ka fak ang. (Sam 145:1)

*Ni tin, ka fak ang chia; I hming hi kumkhaw tlaitluanin ka fak ang. (Sam 145:2)

* Chu mi lai chuan kan ka chu nuihin a khat a,Kan lei chu hla sakin:Chu mi lai chuan hnam tin, zingah,"LALPAN an tan thil ropui take a tihsak a ni," an ti a. (Sam 126:2 )

* LALPA chuan thil ropui takte min tihsak a; Kan lawm hle a ni. (Sam 126:3 )

* I mi chhandam hlimna chu mi pe leh la: Thlarau tihnuamin mi chelh reng ang che. (Sam 51:12 )

* Hlimna leh lawmna chu bengin mi hriattir ang che; I ruh tihtliahte hi a hlim theih nan. (Sam 51:8 )

* Felna chu i ngaina a, suahsualna chu i huat kha; Chuvangin, Pathian, i Pathian chuan, i thiante aia nasain Hlimna hriak a thih tak che hi. (Sam 45:7 )

* Ka mitthi ngaihna chu ka tan lamnaah i chantir a; Ka saiip puan chu mi hlihsak a, hlimnain ka taiah mi hreng ta a: (Sam 30:11 )

* Nangin nunna kawng chu mi hriattir ang a:I hmaah chuan hlima khah liamna a awm a; I kut dinglamah chuan kumkhaw lawmna tur a awm a. (Sam 16:11 )

* Nangmaha an rinna nghat zawng zawngte erawh chu nangmahah chuan lawm sela, I hum thin avangin hlimin au kumkhua hlawm rawh se: I hming ngainate pawh nangmahah chuan lawm takin awm rawh se.( Sam 5:11 )

* A lawmna chu LALPA danah a ni zawk a;  A dan thu chu achhun azanin a ngaihtuah thin. (Sam 1:2 )

* Inngaihtlawmna leh LALPA tih man chu Sum te, chawimawina te, nunna te a ni. (Thufingte 22:4 )

* Vut aiah pangpar thihrui te, lungnaih aiah hlimna hriak te, nguina thlarau aiah fakna silhfente an hnenah pekah Zion-a lungngaia awmte tan ruat tur tein mi tir a ni: ani chu chawimawia a awmna turin, felna thing, LALPA phunte, tih an nih theih nan. (Isaia 61:3 )

* Thuhnuairawlhte pawh chuan LALPAah chuan an hlimna chu an tipung tawh ang a, mihring zinga retheite chu Israel-ho Mi Thianghlimah chuan an lawm tawh ang. (Isaia 29:19 )

* Tichuan a lawmna chu LALPA tihnaah a ni ang: a mita a hmuh angin ro a rel lo vang a, a benga a hriat angin a zilhau hek lo vag: (Isaia 11:3 )

* I thute chu tihlan a ni a, ka ei a, I thute chu ka tan lawmna leh ka thilnlung hlimnaa ni; Aw LALPA, Sipaihote Pathian, i hming kan pu ta si a. (Jeremia 15:16 )

*  Kalawm zel ang, LALPA-ah chuan, ka chhandamna pathianah chuan ka lawm cheu dawn. (Habakuka 3:18 )

* “Lawm ulangin, nasa takin hlim rawh u; vanah in lawman a awm hnem si a; chutiang bawkin in hmaa zawlnei awmte pawh an tihduhdah thin kha. (Matthaia 5:12 )

* “Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang. (Matthaia 5:11 )

* Tin, vantirhkoh chuan an hnenah, “Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni…...” (Luka 2:10)

* Tin, chuti chauh chu ni lovin, kan hrehawmnaah pawh lawmin i awm ang u, hrehawmna chuan chhelna a siam a,( Rom 5:3 )

* Lungngai angin, nimahsela lawm fo siin; rethei angin, nimahsela mi tam tak tihausa siin; engmah nei lo angin, nimahsela engkim ngah siin. (II Korinth 6:10)

* Lalpaah chuan lawm fo rawh u: ka ti leh pek thin ang, lawm rawh u.( Philippi 4:4 )

* Krista tuarnaahte tuarpuitute in nihzia ang zelin lawm zawk rawh u; chutichuan a ropuina a lo lan hunah chuan nangni pawh hlim takin in lawm thei ang. (I Petera 4:13 )

 Ka tawngtainate hi ngaihthlakin a awm ve angem?

* Ka hming pu ka mite chuan inngaitlawma an tawngtai a, min zawn a, an awm dan sualte an hawisan chuan, van atangin ka lo ngaithla ang a, an sualte ka ngaidam ang a, an ram chu ka tidam leh ang.( II Chronicles 7:14 )

* A hmaah ka mangan thu ka sawi a; A hmaah ka buaina ka hriattir thin. (Sam 142:2 )

* Tlaiah te, zingah te, chhunah te ka mangan thu ka sawin ka rum ang a: Tichuan, anin ka aw a ngaithla ang. (Sam 55:17 )

* Mi felte chu an au va, tin, LALPA chuan a lo hria a, An manganna zawng zawngah chuan a chhan chhuak ta a. (Sam 34:17)

* He mi  rethei hi a au va, tin, LALPA chuan a hria a, A manganna zawng zawngah chuan a chhan chhuak ta a. (Sam 34:6 )

*Aw LALPA, zingah chuan ka aw hi i lo hre thin ang a; Zingah chuan ka tawngtaina hi i hmaan ka rel fel diam ang a, ka lo ngaihven thin ang. (Sam 5:3)

* Tin, heti hi a ni ang a, annin mi koh hma pawhin ka chhang ang a; thu an la sawi lai mek pawhin ka bengin ka hria ang.

(Isaia 65:24 )

* Tin, mi lam ang a, ka hnenah in rawn tawngtai ang a, ka ngaithla ang che u. (Jeremia 29:12 )

* Kei hi a tawngtaina chhangtu ka ni a, A tungdingtu pawh ka ni: Kei chu far thing hring dup ang ka ni a, I rah thate chu keima laka mi a ni e. (Hosea 14:8 )  

* “Dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u; (Matthaia 7:7 )

* Tun thlengin ka hmingin engmah in la dil lo; dil rawh u, tichuan in hmu ang, in lawm a kimna turin. (Johana 16:24 )

* Nangni keimaha in awm reng a, ka thu nangmahnia a awm reng bawk chuan in duh apiang dil rawh u, in tan tihin a awm zel ang. (Johana 15:7 )

* Tichuan engpawh kan dil apiang min ngaihthlaksak tih kan hriat chuan a hnena kan thil dila chu kan hmu tawh tih kan hria a ni.

(I Johana 5:15 )

* Hei hi ama chunga kan huaina chu a ni, engpawh a duhzawng anga kan dil chuan anin min ngaihthlaksak thin hi; (I Johana 5:14 )

*  Tichuan a thupekte kan zawm a, a mithmuha thil lawmawm kan tih thin avangin, kan dil apiang a hnen ata kan hmu zel thin a ni.

(I Johana 3:22)

Pathian thuawih ve hi ka duh, min lo pawm ve duh angem?

* Chuvangin ka thu in ngaihthlak tak zet a, ka thuthlung hi in pawm chuan khawvel hnam zawng zawng zingah hian ka tan ro thlan bik in ni ang: khawvel pum pui hi ka ta a ni si a: (Exodus 19:5)

* Chuvangin LALPA in Pathian chu Pathian ani tih hre rawh u; Pathian rinawm, amah hmangaiha a thu zawmtu chunga chhuan sang thlenga thuthlung leh khawngaihna nghat reng a, (Deuteronomy 7:9 )

* Tin, Samuela chuan, "LALPA chuan LALPA thu zawm chu a lawm angin halral thilhlante leh inthawinate hi a lawm em ni? Ngai teh, inthawina aiin thuawih chu a tha zawk a, berampa thau aiin a thu pawm chu a tha zawk a ni. (I Samuela 15:22 )

* Ka thu pawm apiangte erawh chu him takin an awm ang a, Thil tha lo hlau lovin an awm hle hle ang. (Thufingte 1:33)

* Thupek pawm apiang chuan engmah a tuar lo vang a, mi fing rilru chuan ningkhawng a hria a ni. (Thuhriltu 8:5)

* Tihnuam tak leh thu awih taka in awm chuan, in rama thil thate hi in ei ang: (Isaia 1:19 )

* "Ka aw ngaithla ula, in Pathian ka ni ang a, nangni pawh ka mite in ni ang; in that theihna turin in awm dan tur ka hrilh zawng zawg che u zawm rawh u," tiin thu ka pe zawk a ni. (Jeremia 7:23 )

* Nangni leia mi thuhnuairawlh zawng zawng, a thu awih tute u, LALPA chu zawng rawh u; Felna zawng ula, thuhnuairawlh tum rawh u: LALPA thinrimna niah chuan thuhrukin in awm thei mahna. (Zephania 2:3 )

* Ani erawh chuan, “A ni, nimahsela Pathian thu hriaa zawmte hi mi hamtha an ni zawk e,” a ti a. (Luka 11:28)

* Tin, kut tiak dawn ni, ni ropui berah chuan Isua a ding a, a au va, “Tupawh a tuihal chuan ka hnenah lo kal sela in rawh se.

(Johana7:37 )

* Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo vang. (Johana 6:37 )

* Tu hnenah pawh an thu awih tura bawiha in luh chuan (thihna khawpa sual bawih emaw, felna khawpa thu awih bawih emaw,)

a thu in awiha bawih chu in ni tih in hre lo em ni? (Rom 6:16 )

* Tichuan tihthatfamkima lo awmin, a thu awih zawng zawngte tan chatuana chhandamna bulpui a lo ni ta;( Hebrai 5:9 )

* Thlarau leh mo chuan, “Lo kal rawh,” an ti a. A hria apiangin “Lo kal rawh,” ti rawh se. Tuihal apiang lo kal rawh se; a duh

apiangin nunna tui hi athlawnin la rawh se. (Thu Puan 22:17 )

Sual hnathawh chak tak lakah hian, Pathian venhimna ka chang thei angem ?

* Pathian chu kan inhumhimhna leh kan chakna, Mangan laia tanpui vartu hnai reng a ni. (Sam 46:1)

* A thlain a khuh ang chia, A thla hnuaiah chuan i tlu lut ang; A thutak chu phaw te leh phaw lian a ni. (Sam 91:4 )

* LALPA chu nangmah vengtu ani a: LALPA chu i ding lama hliahtu che a ni. (Sam 121:5)

* LALPA chuan sual tinreng lakah a veng ang chia; I nuna chu a veng ang .( Sam 121:7 )

 * LALPA chuan i chhuak leh i lut chu a veng ang che, Tun atanga, kumkhuain. (Sam 121:8)

* Sual tura thlemnaah min hruai lut suh la, Mi sual lakah chuan min chhandam zawk ang che,’ tiin.( Matthaia 6:13 )

* Ngai teh u, rulte, khawmualkaikuangte rah theihna thu ka pe che u a; engmahin a tina tawp lo vang che u. (Luka 10:19 )

* An hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang.( Johana 10:28 )

* Tin, remna Pathian chuan in kephah hnauaiah Setana chu a rawn rah perhtir thuai ang che u. Kan Lalpa Isua Krista khawngaihna

chu in hnenah awm rawh se. (Rom 16:20 )

* “Nangin anni chu khawvel ata i lak chhuah tura ngen ka ni lo va, mi sual lakah chuan i hum tur ka ti zawk a ni. (Johana 17:15 )  

* Keini inralthuamnate chu tisaa mi a ni si lo va, kulhpui nghet takte thiatna tura Pathian zarah thil ti thei tak a ni

zawk, (II Korinth 10:4 )

* Ani chuan thim thuneihna laka min chhan chhuakin, a Fapa hmangaih taka ramah chuan min kaitir ta a; (Kolossa 1:13 )

* Amaherawhchu, Lalpa chu a rinawm e, ani chuan a tinghetin mi sual lakah chuan a hum ang che u.( II Thessalonika 3:3 )

* Chutichuan, Pathian thu thuin awm rawh u; amaherawhchu Diabola dodal rawh u, tichuan a tlan bosan ang che u. Pathian hnaih

rawh u, tichuan anin a hnaih ang che u. Mi sualte u, in kutte silfai rawh u; rilru bulbal nei lote u, in thinlung tithianghlim rawh u.

(Jakoba 4:7 )

* Thil tisualtu chu diabolaa chhuak a ni; diabola chuan atir ata thil a tisual si a, Pathian Fapa lo lan chhan ber chu diabola

hnathawhte a tihboral theih nan a ni.( I Johana 3:8 )

BIBLE MAMAWH CHHANNA (Topical Cont...4)

 ISUA KRISTA :

                Isua amah a inpuanna.

* Khawi kipa awm – Mi pahnih emaw pathum emaw ka hminga an inkhawmna apiangah chuan an zingah ka awm si thin a,” a ti a. (Mathaia 18:20)

* Lei leh vana thuneitu – Tichuan, Isua chu an hnenah a lo kal a, “Lei leh vana thuneihna zawng zawng ka hnenah pek a ni tawh…………. Tin, ngai the u, kei kumkhuain, khawvel tawp thleng pawhin, in hnenah ka awm zel ang,” a ti a. ( Mathaia 28: 18-20)

* Chawlhni Lal – Tin, amah vekin an hnenah chuan, “ Chawlhni hi mihring tana siam a ni a, mihring hi Chawlhni tana siama ni lo ; Chutichuan Mihring Fapa hi Chawlhni chungah lam pawh hian Lal a ni,” a ti a. ( Marka 2:27-28)

* Thlalera autu aw – Tin, a ni chuan, “ Lalpa kalkawng tirual rawh u,” ti a thlalera autu aw ka ni, Zawlnei Isaia sawi ang khan,” a ti a. ( Johana 1:23)

* Vana awm, van atanga lo chhuk – Vanah tumah an lawn ngai lo, van atanga lo chhuka chauh lo hi chu, Mihring Fapa vana awm hi. ( Johana 3:13)

* Pathian Fapa (Pathian hminga lo kal) – Ka Pa hmingin ka lo kal a nih hi, nangnin mi lawm si lo : mi dang mahni hmingin lo kal sela, a ni chu in lawm ang. ( Johana 5:43)

* Van atanga chhang nung lo chhuk – Kei hi van atanga chhang nung lo chhuk chu ka ni, tupawhin he chhang hi a ei chuan chatuanin a nung reng ang, a ni, khawvel nun nana ka pek tur chhang chu ka tisa hi a ni, “ a ti a. (Johana 6:51)

* Khawvel entu – Tin, Isuan an hnenah thu a sawi leh a. “ Kei khawvel entu ka ni; tupawh mi zui chu thimah a leng tawp lo vang a, nunna eng a nei zawk ang,” a ti a. (Johana 8:12)

* Abrahama awm hma pawha awm tawh – Isuan an hnenah, “ Tih tak meuhvin, tih tak meuhvin ka hrilh a che u, Abrahama awm hma pawhin ka awm,” a ti a. (Johana 8:58)

* Kawng leh thutak leh nunna – Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo…..” (Johana 14:6)

* Amah hmu chu Pa hmu -  Tupawh mi hmu chu Pa hmu a ni. ‘Pa chu min hmuhtir rawh,’ eng ti tiha I ti nge ni ? (Johana 14:9)

* Alpha leh Omega – ‘ Kei Alpha leh Omega ka ni “ Lalpa Pathian, awm meka leh awm tawha leh lo la awm tura, Engkimtitheia chuan a ti a ni. ( Thupuan 1:8)

 Isua chung chang Pathianin a puan chhuahna.

* Tin, ngai teh, van atangin aw in, “ Hei hi ka Kapa duh tak, ka lawm em ema chu a ni,” a ti a. ( Mathaia 3:17) 

* A la sawi lai mekin, ngai teh, chum var takin anmahni a rawn hliah ta a, tin, ngai the, chum atang chuan awin, “ Hei hi ka Fapa duh tak, ka lawm em ema chu a ni; ama thu ngai rawh u,” a ti a..(Mathaia 17:5)

* Mihring hriattirna mah kan pawm  chuan Pathian hriattirna chu a ropui zawk si a; Pathian hriattirna chu hei hi a ni, “ Ka Fapa chanchin ka hriattir tawh,” tih hi a ni si a. (1 Johana 5:9)

* Isua – Mihring takzet leh Pathian takzet.

*  Abrahama thlah – Abrahama thlah, Davida thlah, Isua Krista thlahtute inthlah dan chanchin chu……..  Jakoban Josefa, Mari pasal chu a hring a; chu mi Mari lakah chuan Isua, Krista an tih hi, a lo piang ta a. ( Mathaia 1: 1 , 16)

* Bethlehema piang – Tin, lal Heroda a lal laia, Judai rama Bethlehem khuaa Isua a lo pianin ngai teh, khaw chhak lam ata mi fingte Jerusalem khuaah an lo kal a. ( Mathaia 2:1)

* Mihring fapa –  “…….. Mihring fapa hi Chawlhni Lal a ni si a,” a ti a. (Mathaia 12:8)

* A lungngai – Tin, an hnenah, “Ka rilru a lungngai  em em a, thihna khawp hial a ni ; hetah hian awm ula, mi venpui rawh u ,” a ti a. (Mathaia 26:38)

* A ril tam – Tin, atukah chuan Bethani atanga a chhuah hnuin a ril a lo tam ta a. (Marka 11:12)

* Hmeichhe hrin – Tin, vantirhkoh chuan a hnenah, “Mari hlau suh ; Pathian ngaihsak zawng I ni e. Ngai rawh I rai ang a, fapa I hring ang a, a hmingah chuan Isua I sa tur a ni…… ,” ( Luka 1:30)

* A thang lian – Tin, Isua chu a fing deuh deuh va, a lo lian telh telh a, Pathian leh mihring duhsakin a awm deuh deuh va. ( Luka 2:52)

*A thlan thi far angina a far – Tin, a thlaphang em em a, thahnemngai lehzualin a tawngtai a; a thlan chu thi far lian tak angina leiah a far a. (Luka22:44)

* A hah thei – Chutichuan Isua chu a kal hah a vangin tuichhunchhuah sirah chuan a thu chawt a ; chaw fak hun lai a ni a. ( Johana 4:6)

* Mihring Krista Isua – Pathian pakhat chauh a awm a, Pathian leh mihring inkara Palai pakhat chauh a awm bawk a, amah chu mihring a ni, Krista Isua, (1 Timothea 2:5)

* Thlemna a tawk – Puithiam Lalber kan chak lohnate min hriatpui thei lo nei kan ni si lo. Keimahni anga kawng tinrenga thlemna tawk tawh, sual erawh chu sual lo, nei kan ni zawk e. (Hebrai 4:15)

 Lal Isua hming leh athiltihtheihna –

* A hminga inkhawmna ah Isuan awm zel a tiam - Mi pahnih emaw pathum emaw ka hminga an inkhawmna apiangah chuan an zingah ka awm si thin a,” a ti a. (Matthaia 18:20)     

* Heng chhinchhiahnate hian ringtute a zui zel ang -  Tin, heng chhinchhiahnate hian ringtute chu a zui zel ang: Ka hmingin ramhuaite an hnawt chhuak ang a, tawng thartein an tawng ang a; rulte kutin an la ang a; thihna tur engpawh in mah sela engmah an ti lo vang a; damlote chungah an kut an nghat ang a, an dam zel ang,” a ti a. (Marka 16:17-18)

* Isua hmingin thil mak an ti - Isua erawh chuan a hnenah, “Khap tawh suh u, tupawh nangni dodal lo chu in lama tang an ni si a,” a ti a.( Luka 9:50)

* Pain Isua hmingin Thlarau Thianghlim a tir - Tin, Thlamuantu, Thlarau Thianghlim, Pain ka hminga a rawn tirh tur khan, chu mi chuan engkim a zirtir ang che u a, inhnena ka sawi zawng zawng a hriat chhuahtir leh ang che u. (Johana 14:26)

* Isua hmingin Pa hnenah dil tur - Nangnin mi thlang lo, keiman ka thlang zawk che u a, va rah tur leh in rah awm reng turin ka ruat bawk a che u; ka hminga Pa hnena in dil apiang a pekna tur che uin. (Johana 15:16)

* Isua hminga Baptisma  - Tin, Petera chuan an hnenah, “Sim ula, in sual ngaihdam nan Isua Krista hmingin baptisma chang theuh rawh u; tichuan Thlarau Thianghlim pek hi in hmu ang. (Tirhkohte 2:38)

* Isua hminga rawng bawl - Nimahsela Peteran, “Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh,” a ti a. (Tirhkohte 3:6)

* Isua hminga tihdam  - Nangni zawng zawngin hre rawh u, Israel mi zawng zawng pawhin hre rawh se, Nazareth Isua Krista, kraws-a in khenbeh, Pathianin mitthi zing ata a kaihthawh leh kha, amaha hming ngeiin he mi hi hetah in hmaah damin a ding ta a nih hi. (Tirhkohte 4:10)

* Isua hming lo chu min chhandam tur hming dang reng a awm lo - Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo,” a ti a. (Tirhkohte 4:12)

- Mite tidam turin nangin i kut phar ang che; i chhiahhlawh thianghlim Isua hming avangin chhinchhiahna leh thilmak takte tihtir bawk ang che,” an ti a. (Tirhkohte 4:30)

* Philipan Isua hmingin chanchin tha a hril - Nimahsela anni chuan Pathian ram chanchin tha leh Isua Krista hming chanchin tha Philipa hrilh chu an awih veleh ahmei apain baptisma an chang ta a. (Tirhkohte 8:12)

* Paulan Isua hmingin thu a hril -  Barnaba erawh chuan ani chu a hruai a, tirhkohte hnenah chuan a rawn kalpui a, kalkawngah Lalpa a hmuha a biakzia te, Damaska khuaa Isua hminga huai taka thu a hrilzia te pawh chu an hnenah a sawi ta a. (Tirhkohte 9:27)

* Baraba leh Paulan Isua hminga tawrh an huam -  Chuvangin thu khat vuaa kan inkhawmin, kan duh tak Barnaba leh Paula, Lalpa Isua Krista hming avanga thih dawn lote kal rual hian mi thlante in hnena rawn kaltir ve tha kan ti a. (Tirhkohte 15:25,26)

* Paulan Isua hmingin ramhuai thu a pe - Chutiang chuan ni rei tak a ti thin a. Chutichuan Paula chu a lungni ta lo va, a hawi a, ramhuai hnenah chuan, “Isua Krista hmingin a kawchhung ata chhuah thu ka pe a che,” a ti a. Tin, chutih lai tak chuan a chhuak ta nghal a. (Tirhkohte 16:18)

* Paulan Isua hminga thih a huam - Tin, Paula chuan a chhang a, “Eng in ti nge ni, in tah in tah a, ka lung in tihchhiat? Lalpa Isua hming avang chuan Jerusalem khuaa phuar chang ka huam lova, thih pawh ka huam asin,” a ti a. (Tirhkohte 21:13)

* Kohhran hovin Krista hming an lam - Korinth khuaa Pathian kohhranho awm, Krista Isuaa tihhran, mi thianghlim ni tura kohte hnenah ram tina kan Lalpa (anmahni leh keimahni Lalpa) Isua Krista hming lam zawng zawng hnenah nen: (I Korinth 1:2)

* Paulan Korinth mite Isua hminga pumkhat turin a ngen - Tin, unaute u, in zain thu thuhmun in sawi a, inzinga inthenna reng a awm lohna turin, rilru hmunkhat leh ngaihtuahna hmunkhata fel taka in inzawm tlat zawkna turin kan Lalpa Isua Krista hmingin ka ngen a che u. (I Korinth 1:10)

* Isua hminga tlenfai, tihthianghlim, thiam chang kan ni -  Tin, nangni thenkhat chutiang mi in nih thin kha; nimahsela Lalpa Isua Krsta hmingah leh kan Pathian Thlarauvah tlenfai in ni tawh a, tihthianghlim in ni tawh a, thiam chang in ni tawh. (I Korinth 6:11)

* Isua hmingin Pa hnena  lawmthu hril - Kan Lalpa Isua Krista hmingin, Pathian, Pa ngei hnenah chuan engkim chungah lawmthu hril fo rawh u. (Ephesi 5:20)

* Hming chungnung ber - Chu mi avang chuan Isua hmingin mi tin – vana mite, leia mite, lei hnuaia mite nen – an thingthit nan leh Pa Pathian tihropuina turin, “Isua Krista chu Lal a ni,” tiin lei tinrengin a puan nan, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a. (Philippi 2:9-11)

* Thil engkim Isua hminga ti vekin - Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u. (Kolossa 3:17)

* Isua hming ring tura thupek - Tin, a thupek chu hei hi a ni, a Fapa Isua Krista hming ring ila, aman thu min pek angin inhmangaih tawn bawk ila. (I Johana 3:23)

 5.             THUTHLUNG HLUIA ISUA CHUNGCHANG HRILHLAWKNA LEH THUTHLUNG THARA  A THLEN FAMKIMNA :

                Abrahama thlah

                < Ka thu i awih tak avangin i thlahah chuan khawvela chitin an la thawveng ang tih, mahni leh mahni inchhalin chhia ka chham ta, LALPAN a ti," a zuk ti a. (Genesis 22:18)

                > Abrahama thlah, Davida thlah, Isua Krista thlahtute inthlah dan chanchin chu: (Matthaia 1:1)

Isaka thlah

< Tin, Pathianin, "Nilo ve, i nupui Sarin fapa a hrinsak zawk ang che; a hmingah chuan Isaaka i sa tur a ni: tin, ka thuthlug chu ama hnua a thlahte tan kumkhaw thuthlung atan a hnenah chuan ka tinghet ang. (Genesis 17:19)

> Chu mi chu Jakoba fa a ni a, chu mi chu Isaaka fa a ni a, chu mi chu Abrahama fa a ni a, chu mi chu Tera fa a ni a, chu mi chu nahora fa a ni a, (Luka 3:34)

Jakoba thlah

< Nakin hnua a awm dan tur ka hmu a, Tun mai piah lam ka hmuhsak a: Jakoba atangin arsi a lo chhuak ang a,

Israela atangin lal tiang a lo chhuak ang a, Moab ram tluanin a chhun tlang ang a, Setha thlahte a titlawm ang. (Number 24:17)

> Abrahaman Isaaka a hring a; Isaakan Jakoba a hringa a; Jakoban Juda leh a unaute a hring a; (Matthaia 1:2)

Davida lalthutthleng luahtu tur

< A ram a zu zel ang a, a ramah remnain tawpintai a nei lo vang; Davida lalthutthlengah a thu ang a, dik tak leh fal takin rorelin a rawn tinghet ang, tun atanga kumkhuain, thahnemngaihna chuan chung chu a ti ang. (Isaia 9:7)

> Ani chu mi lian a la ni ang a, Chungnungbera Fapa an ti ang; Lal Pathianin a hnenah a thlahtu Davida thutphah chu a pe ang a; (Luka 1:32)

Nula Thianghlim hrin

 < Chuvangin Lalpa ngei chuan chhinchhiahna a pe ang che u; ngaiteh u, nula thianghlim pakhat a rai ang a, fapa a hring ang a, a hmingah Immanuela a sa ang. (Isaia 7:14)

> Tin, Isua Krista lo pian dan chu hetiang a ni : A nu Mari chu Josefa nen an inhaul lain, an inpawl hmain, Thlarau Thianghlimin a raitir tih an lo hre ta a. (Mathaia 1:18)

> Tin, Lalpa zawlnei kaah, “Ngai teh, nula thianghlim chu a rai ang a, Fapa a hring ang a, A hmingah Emmanuela an sa ang,” tia a sawi kha a lo thlen theihna turin chung zawng zawng chu a lo awm a ni. (Emmanuela chu, ‘Kan hnena Pathian awm,’ tihna a ni) (Matthaia 1:22, 23)

 Bethlehema piang

 < Nimahsela nang Bethlehem  Ephratha, Juda rama sang tamtak zinga telah te hle mah la, Nangma lak a tang hian Israel ho roreltu tur chu ka tan a lo chhuak ang a; a lo chhuahna chu hmasang ata, chatuan atangin a ni. (Mika 5:2)

> Tin, lal Heroda a lal laia, Judai rama Bethlehem khuaa Isua a lo pianin ngaiteh, khaw chhak lam ata mi fingte Jerusalem khuaah an lo kal a. (Mathaia 2:1)

Bethlehemah naupangte tihhlum an ni

< LALPA chuan heti hian a ti, Rama khuaah thawm an hria Mitthi ngaia tap tlawk tlawk, Rakilin a fate a tah a, A fate an awm tawh loh vangin Thlamuan theih a ni lo. (Jeremia 31:15)

> Chutih lai chuan Herodan, mi fingte tihder a nih a inhriat veleh a thinur em em a, mi a tir a, a hun lai tak thu dilchhut taka mi fingte a zawh chhuah ang khan Bethlehem khua leh a vel zawng zawnga, mipa naupang kum hnih achin hnuai lam chu an zain a that ta vek a. (Matthaia 2:16)

> Tichuan, Zawlnei Jeremia hrilhlawknate chu alo thleng famkim ta a. (Mathaia 2:17)

Isuan tehkhin thu in thu a sawi

< Tehkhin thuin ka ka ka ang ang a; Hmasanga thu ril sawite kha ka sawi chhuak ang: (Sam 78:2)

> Chung zawng zawng chu Isuan tehkhin thuin mipuite hnenah a sawi a, tehkhin thu lovin an hnenah engmah a sawi lo: zawlneiin, "Tehkhin thuin ka ka ka ang ang a, Leilung pian tirh ata thil inthup chu Ka sawi chhuak ang," tia a sawi kha a lo thlen theihna turin. (Matthaia 13:34)

Isua chawimawia a awm

 < Aw Zion fanu, nasa takin hlim la; Aw Jerusalem fanu, au chhuak rawh; Ngai rawh, I lal I hnenah a lo kal e; Mi fel a ni a, hnehtu a ni; Inngaitlawm takin sabengtung chungah a chuang a. (Zakaria 9:9)

> Tum kaute an keng a, a hmuak turin anva chhuak a, “Hosana, Lalpa hminga Israel Lal lo kal chu fakin awm rawh se,” tiin an au va. Tin, Isuan sabengtung no a hmu a, a chungah a chuang a. (Johana 12:13-14)

Naupangten Isua an fak

< Hmelma leh phuba latu tihdaihna turin,Nangmah dotute avangin

Nausente leh hnute hne laite kaa chhuak chuanin chakna i tinghet a.( Sam 8:2)

> Nimahsela, puithiam lalte leh lehkhaziaktuten a thil mak tithe leh biak ina “Davida fapa Hosanna!” tia naupang aute chu an hmuhin an lungni lo em em a, a hnenah, “Hengho thu sawi hi i hria em?” an ti a. Tin, Isuan an hnenah, “Hria e; ‘Nausente leh hnute hne laite kaa chhuak chuanin Fakna I tithafamkim ta,’ tih hi in chhiar ngai lo vem ni?” a ti a, (Matthaia 21: 15 – 16)  

Judaten Isua an ring lo

< Kan thu sawi tuin nge ring? LALPA kut chu tu hnenah nge a lan? (Isaia 53:1)

> An hmaah chutiang thilmak tam tak ti mah sela, amah an ring si lo:  ‘Lalpa kan thusawi tuin nge ring? Lal kut pawh tu hnenah nge a lan?’ tih, Zawlnei Isaia thusawi kha a thlen nan. (Johana 12:37)

Isua man leh hrem              

*< Ani chu hnehchhiahin a awm a, nimahsela a inngaitlawma, a ka pawh a ang lo; beramno talh tura an hruaia ang leh, beram a hmul met tu hmaa ngawi renga awma ang main; a ni a ka a ang lo. (Isaia 53:7)

> Tichuan Puithiam Lalber chu a ding chhuak a, a hnenah, “Engmahin i chhang lo maw? Heng hian an hekna che hi engtizia nge ni?” a ti a. Isua erawh chu a ngawi reng a. (Mathaia 26:62-63)

*< Ka hnungzang hi vawtute hnenah ka dawh a, ka biangte hi hmul pawttute hnenah ka dawh bawk a : mualphonaah leh chilah ka hmai ka hup lo. (Isaia 50:6)

> Tin, a thenin amah chu chil an chhak ta pang a, a hmai an tuam a, an hnek a, a hnenah, “Sawi rawh ,” an ti a. Tin, chhiahhlawhte chuan an chelh pahin an beng sawk sawk a. (Marka 14:65)

                Isua khenbeh

 < Chuvangin ani chu miliante chanvo ka sem ve ang a, ani chuan rallak sumte chu mi chakte a sem ve ang; a nunna chu thi khawp hiala a leih buak a, bawhchhetute zinga chhiartela a awm avangin : nimahsela mi tam tak sualna chu a phur a, bawhchhe tute tan chuan a tawngtai sak a. (Isaia 53:12)

> Tin, ama rual chuan suamhmang pahnih an khengbet ve a, a ding lamah pakhat, a veil amah pakhat. (Mathaia 27:38)

                Thumvawrin Isua silhfente an insem

 < Ka silhfente an insem a, Ka kawr atan thum an vawr a. (Sam 22:18)

> Tin, kraws-ah an khengbet a, an chan theuh tur hriat nan thum vawrin a silhfente chu an insem a. (Marka 15:24)

Isua ruhte tihtliah a ni lo

< A ruh zawng zawng a vawng tha a, Pakhat mah tihtliah a ni lo.( Sam 34:20)

> Nimahsela Isua kiangah an lo kal a, a thi tawh reng tih an hria a, a kete an titliak ve lo va; (Johana 19:33)

> Pathian Lehkha Thu, “A ruh pakhat mah tihtliah a ni lo vang,” tih, thlenna turin chung thil chu a lo awm ta. (Johana 19:36)

Isua vana lawn

*< Nang chu chung lamah i chho va, i man te chu sal ah i hruai a; Mihringte zingah thilpekte i dawng a, A ni, helhmangte zingah pawh; LALPA Pathian chu an hnena a awm theih nan. (Sam 68:18)

> Tin, heti hi a ni a, mal a sawmsak lai takin anni chu a then a, vana hruai chhohvin a awm ta a. (Luka 24:51)