NUN TAK

NUN TAK

                          

            He kan ringtu nun ah hian ‘NUN TAK’ a awm rual in, ‘nun lem’ pawh a awm thei a. Hmanah chuan nun tak viau thin, tunah erawh ‘nun dal’ ru riau tawh pawh ala awm thei cheu.

            NUN TAK chu enge a awmzia?

           

Tun lai bawnghnute tui pawlh loh, ‘Pani’  erawh an pawlh ruk hram ang hi ni ve lovin.

            A der reng  awm ve loh na ‘Chawhpawlh loh nun’.  Sual leh a kaihhnawih thil engmahin a pawlh dal loh, ‘ISUA TANA NUN HLANG’  tiin kan hrilhfiah thei  ang.

            Tih tak zeta Isua nun nghahchhan atana hmanna hi ‘NUN TAK’ chu ani a. Chu nun chu chhungril lamah tuh tiaha awmin, pawnlam lang thei ah mawina tinreng nen a par chhuak thin.

           

Heng mi te hi zawng ‘NUN TAK’ neitu te kan ti thei hauh lo ang le !! Thutak Krista nei silo a, mahni intitak a. Thlarau Thianghlim uap hauh loha inhmuamup a, hlemhletna pai reng chunga dikna laltiang lek tum mi te. Lei lawmna um ngat ngat chunga, Van lawmna ban ngar ngar thin. It na, awh na, huat na, elrel nen, tisa nun hlip phal hauh lova Krista thuam bel  tum tlat mi te hi.    

            NUN TAK nei tura Isua Kristaa siam danglam tawh te kan nih laiin, kan nun hian pawlh daltu tam tak a nei thin. Heng – Materials thil chi hrang hrang, Isua aia kan thlakhlelh thil te. ‘Tunlai dan alawm, mi te pawn an ti ve tho,’ ti a, Khawvel laka kan danglam ngam loh fo nate. Kan nun ‘hohna’ leh kan chhungril nun suk thlek zawng pawnlang tawh lutuk avang te. Nungchang aia hair style uluk zawk, Thutak aia pocket money pai tam zawk  kan tam ta lutuk te. Sum ngainatna leh sual palzamna nasa tawh lutuk te hian kan nun hi a va ‘pawlh dal’  nasa ta em!! AIDS, Hindu Yoga, kan value system, kan chhungril nun za so san tawh zia leh physical leh moral corruption hluar tawh zia mawlh mai te hi. Kan ram hmabak hi engtin ni zel ang maw ?  

‘NUN TAK’ kan ram mamawh :

Kan ram nun hi ngun takin thlir ila, nun bulbal leh nghahchhan bul fuk kan nei meuh em? Mi tam zawk hi chu luang thli chhem nghin ang mai hian, lehlam lehlamah kan nghing tawn vel mai mai thin ni hian alang em? Kan boruak tawn chi hrang hrang te hi, Kristaa ‘nun tak’ nei tute nun dan tur nena in mil hauh lo ava tam teh reng em? Hetiang taka nun bulbal neilo leh nghah chhan bulfuk nei lova kan kal zel chuan, kan hmabak hi a eng lo hle thei ang. Kan ram hi kan chhehvel hnam te hian min lo siamthat sak dawn hauh lo a, keimahni ngeiin a thawha kan thawhchhuah a ngai. Chuvangin ‘nun tak’ thiltihtheihna hmanga kan ram hi luah khata, ram kal siam her dik leh tur in, puanven sawi chhinga  nun bul kan tan thar atul takzet ta.  

           

NUN TAK chu engtinnge kan neih ang?

           

A pawng a taka intih mi tak viau leh inhmuam up ngawt lam ani ber tlat lo. Kan nuna ze thalo lai apiang te paih thla a, Isua Krista nun kan tawmpuina leh khawvel hipna leh nekna nasa tak karah pawh ‘ISUA NEIH KA DUH ZAWK’  kan tih tlatna atangin  kan nei anga. Amah kan hnaih zual zelna atangin ‘ NUN TAK’ chu keimahni ah thang lian in, Krista kan lo par vul pui tawh ang.

                        NUN TAK neitu te chuan thlemna an hneh thin, sualin a hneh ve ngailo. Dikna leh takna, rinawmna leh hmangaihna chu an nun ani a. Lei leh Van malsawmna dawng chunga Krista hmel  tarlangin, Pathian leh Van khawpui an tilawm a. Kalvari tuinung lui dawnin, Lei lawmna aia lawmna ropui zawk, Van lawmnaa chhun khah in an awm thin.

                                   

Isu, tui nung lui I ni,

                                    Nun tuihala chau tan in tur tak I ni:

                                    Ka tuihal tawh lo vang, he khawvelah hian,

                                    Ka nunna atan Lalpa I tawk a ni.