Mi Beidawngin – Beiseina Eng

Mi Beidawngin – Beiseina Eng

( Zaipawl Conductor Asaph-a)

              Mi Lu khai leh Ram lama thangchhuah kherlo pawn In lamah tal thang an chhuah thei a. Ral rel thiamlo leh ngunhnam lek thiam hauh lo tepawn Knighthood an dawng fova. Tonic Solfa leh Staff Notation thiam miah lo chung pawha ‘Zaipawl Ropui Conductor’ ani thei hi amak hranpa lo ve.

Asaph-a ngat hi zawng a theuneu lo ani tawp mai : Gersoma thlah, rimawia rawngbawlna kawnga mi thuk, athukna piahlama hmahruaitu ala ni cheu. Lal ropui Davidan zai hruai tur leh darbenthek (Cymbal) ring taka tuma zaipawl hruai tura aruatte zingah langsar pawl ani a (1Chro 6;15). Solomona Temple-a Pathian bawm an lak luh tum pawh khan hla satu zingah a hming a chuang hmasa ber nghe nghe (2Chro 5:12). A thlahte thleng pawhin musician an la nita zel a. Solomona Temple an dinthar leh thleng pawh khan a thlahte chu tawtawrawt leh darbenthek tum pawlah an la tel chhunzawm fan ani (Ezra 3:10 ; Neh 11: 22, 12:35).

  

 Zai leh rimawi tum a thiam mai piah lamah fakna hla pawh a siam hnem nangiang mai. Heng fakna hlate hian thlarau lamah pawh Asaph-a hi a thuk hle tih an tilang fiah (Sam 50; 73-83). Asaph-a talent dawn hi zawng aropui a, a nihna leh chanvo tinreng hi a nep lo hlawm tak zet ani.

Mahse chuti ngawt a lo ni bik lo : Hetiang taka Pathian hnen ata talent ropui dawnga, chanvo hlu em em mai han chan  bawk chu ava lungawi thlak dawn tehlul ngai em !! Mahse chuti ngawt a lo ni bik lo - Asaph-a hi a thlarau nun achau vin, a hringnun zinkawngah khan a beidawng ve fova, Pathian lakah meuh pawh zu phunnawi ve nuah nuah fova mawle. Nun azawnga nun awhawm bik leh hringnun zinkawng awlsam tak chu alo ni bik hauh lo mai.

Khawngaihthlak letling zawk deuh a nia :  “ Hetian rinawm takin Pathian rawng ka bawl ve a, mah se retheihna leh hringnun hrehawmna ka pumpelh chuang der si lo. He nun leh he rawngbawlna hi enge a awmzia ?’ tih zawhna te chuan a lo bual a ve mup mup thin a. A chhehvel a thlir in, Pathian ngaihsak lote chu an hausa thur thur a, ani lah a rethei tial tial ten a inhre thul. Hrehawm a tawrh ngawih ngawih laia, khawvel mite erawh hrehawmna hnuaichhiah ni awm taka an duhthusam aia tam an nei bik tlat thin te chuan a lungawi lohna leh beidawnna a belh chhah hle ani ngei ang ?  “ A thlawn mai in ani ka thinlung hi ka tihfai a, ka kutte sawiselbonaa ka sil ni. Sawisak leh zilhauvin ka awm nen, hetiang reng reng chu ka tlin lo. Mi suaksual zawkte dinhmun ka hmuh hian, mi uangthuangte chu ka awt ani” ti khawp hialin khawvel hipna leh beidawnna chuan alo uai kun ve tlawk tlawk thin alo ni. Khawngaihthlak zawk in !!

A beidawnna ngawtah a tawp lo : Khatianga innghahna leh belhtur nei lo rilru baihvai taka a awm lai khan, a hring nun leh hringnun piah chatuan nun thlenga nghawr danglam dawrh thei thil tih fuh em em mai anei ta hlauh mai. Chu chu enge ni ang le ? Hei te mai hi mawle ….  ‘Ama lam ngawt in en lo vin ‘ Entur Dik – Pathian lam en nachang a hria’. En tur dik en tu te chuan, beidawnna kar ah beiseina eng an nei tlat zel.

Thil a danglam zo ta, chutah zet chuan a thlarau mit tih varin a awm a. A thinlung chau tan chakna leh a hausakna chu Pathian ani tih hria in, “ Nangmah hlata awmte chu an boral dawn si a. Kei atan zawng Pathian hnaih hi a tha a ni : Pathian chu ka inhumhim naah ka hmang a…” tih thu mawi tak hi alo chham chhuak thei ta hial a ni.

Pathian hlata awm lui tlat te kha engtinnge an awm tak? - Asaph-a bawk hian sawi teh se, “ Anni chu hmun nal takah te I dah ngei a: Chhiatnaahte I paihthla thin a. Engtizia nge mitkhapkar chauhva an tiau tak ni aw! Thil rapthlak taktea tihboral daihin an awm ta a nih hi” ati hmiah mai. An tawpna zawng a it awm fahran loh khawp mai, Hremhmunin alo hmuak ngur mai dawn bawk nen !!!??? A salai ber district !!!

Pathian lam ena Pathian hnaih nachang hriat hi a finthlak :  Khawvel hipna leh a beidawnnaah khan tawp ta ngawt se zawng, zaipawl Conductor Asaph-a meuh pawh chauin a tlu hlum ve ngei ang.  Kei tehlul pawh hian a chanchin ziakin amah atang hian ‘Beiseina Eng’ ka chhhar miahlo ang le.

Tunlai khawvel hipna leh nekna nasa tak karah hian kan mita hmuh leh benga hriatten min lo tichau vin kan lo beidawng ve rum rum fo anih pawhin kan dem awm hran lo ve. Mahse chu chu ringtute kan tawpna tur erawh ani hauh lo. Asaph-a anga beiseina eng nei tlat in ‘Tlaingailo Pathian hnaih luih tlat zel hi a him ber. Kan Pathian hi  in hmuhimna leh chakna mangan lai a tanpui vartu hnai reng... Tlaingailo Pathiaa ni si a’.  (SAM 73)

I hringnun zawh laiah harsatna tawk in …… LALPA i au thin,  a tanpuina dil in….., mahse beisei angin alo hnai mai si lo. Rilru a beidawng – thinlung a rum thin ti raw ?? Mahse chauvin zam mai suh aw … Tlaingailo Pathian hian a thlahthlam phal reng reng lo che asin ….. Isuan a hmangaih reng che !!